O Consello da Unión Europea prohibe sen excepcións a amputación
das aletas das quenllas. No 2003 xa se prohibira, exceptuando certos
casos mediante a concesión de permisos especiais. O antigo regulamento permitía
ás flotas de España e Portugal, as únicas que se dedicaban a esa pesca, cortar a
bordo dos buques as aletas das quenllas. Unha vez obtida a parte máis valorada
do animal, tiraban o resto do corpo. O novo regulamento elimina calquera tipo
de excepción e obrigará ós buques pesqueiros a desembarcar todos os exemplares
de quenllas con aletas adheridas. Así as aletas e os corpos xa non poderán ser
descargados en portos distintos, facilitando a súa detención e control. Os
pescadores españois calculan que este cambio lexislativo ocasionará unha perda
de entre 9 e 10 millóns de euros ó sector.
Tanto as quenllas como as raias son especies moi
vulnerables á sobreexplotación e nos últimos anos algunhas poboacións destes
peixes víronse en perigo pola súa alta demanda en países asiáticos, para a cociña
ou elaboración de remedios tradicionais. A asociación a favor dos animais Humane
Society International celebra a aprobación desta nova lei, xa que elimina esas “lagoas”
lexislativas da de 2003. A súa directora, Joanna Swabe, por medio dun
comunicado expresa a súa satisfacción e aproveita para subliñar que decenas de
miles de quenllas morren ó ano nos océanos debido a este tipo de pesca. Recorda
ademais que a UE é un dos maiores exportadores de aletas a Asia, pese a que un
terzo das quenllas e raias están consideradas en perigo de extinción pola Unión
Internacional para a Conservación da Natureza.
Antía Quintana Gallego, 1º BACH A
No hay comentarios:
Publicar un comentario