Un estudo
realizado pola Unión Internacional para a Conservación da Natureza (UICN)
revela que España é o país europeo onde se concentra a maior porcentaxe de
especies ameazadas de todo o continente. España contén arredor dunhas 85.000
especies de animais e plantas, o que supón o 54% do total das especies
descritas en Europa e un pouco máis do 5% da biodiversidade mundial. Ademais,
moitas delas son endémicas, é dicir, que tan só se atopan neste recuncho do
planeta.
A pesar destas
esperanzadoras cifras, moitas das especies están en perigo de extinción. O
proxecto tomou como base a Lista Vermella Europea, un catálogo que recolle o
grao de ameaza das especies europeas en perigo, e asegura que o 38% das
especies presentes nesa lista se atopan en España. É a cifra máis alta do
continente, seguida de Grecia (32%) e Portugal (22%). Máis concretamente, o
estudo desvela que no noso país están ameazados o 19% dos mamíferos, o 24% dos
réptiles, o 7% dos anfibios, o 37% dos peixes de auga doce, o 5% das
bolboretas, o 8% das libélulas, o 6% dos escaravellos, o 26% dos moluscos
terrestres, o 34% dos moluscos de auga doce e o 26% das plantas vasculares. A
fragmentación e perda de hábitat, a sobre-explotación de acuíferos, a
contaminación e a introdución de especies invasoras, son as principais ameazas
ó noso patrimonio natural.
Estes datos
resultan preocupantes, pero aínda o é máis que as políticas de biodiversidade
estean practicamente abandonadas polas administracións estatais e autonómicas. “Ecologistas en Acción”, que organizou o pasado martes 21 en Madrid un debate para analizar a
situación da biodiversidade, denuncia que as Comunidades Autónomas respaldan
proxectos que, teoricamente, favorecen o crecemento económico pero en realidade
o único que conseguen é traer graves consecuencias ambientais e sociais (como o
de converter a Galicia nunha gran mina). Ademais, o Ministerio de Agricultura,
Alimentación e Medio Ambiente centra os seus esforzos en cambiar a normativa
ambiental, ocasionando graves consecuencias de desprotección e desregulación
(como o intento de modificar a Lei de Costas). As políticas de conservación
empregadas ata agora son insuficientes para garantir a continuidade da nosa
diversidade. Se se destinasen máis esforzos e recursos para a investigación e o
desenvolvemento de políticas eficaces de xestión, esta conservación podería
asegurarse.
Antía Quintana Gallego, 1º BACH A
2 comentarios:
Antía gustoume moito o teu comentario. Poderías definir o concepto de Biodiversidade? Indica algunhas causas da perda de Biodiversidade en España.
O concepto biodiversidade refírese á gran variedade de seres vivos que habitan o noso planeta e os patróns naturais que a conforman.
A introducción de especies invasoras, a sobre-explotación dos acuíferos, a contaminación e a fragmentación e perda de hábitat son algunhas das causas da perda de biodiversidade en España.
Publicar un comentario